ప్రకృతి వ్యవసాయంపై రైతులకు అవగాహన

ప్రజాలహరి – మిర్యాలగూడ (హరిప్రసాద్ చీదెళ్ల): మిర్యాలగూడ మండలంలో సోమవారం NMNF (నేషనల్ మిషన్ ఆన్ నేచురల్ ఫార్మింగ్) కార్యక్రమంలో భాగంగా రైతులకు ప్రకృతి వ్యవసాయంపై అవగాహన సమావేశం నిర్వహించారు.

ఈ సందర్భంగా మండల వ్యవసాయ అధికారి ఎం. రుషేంద్రమణి, కిసాన్ సెల్ జిల్లా అధ్యక్షుడు ముదిరెడ్డి నర్సిరెడ్డి మాట్లాడారు. ప్రకృతి వ్యవసాయం ద్వారా నేల ఆరోగ్యాన్ని కాపాడుకోవడంతో పాటు రసాయన ఎరువులు, పురుగు మందుల వినియోగాన్ని తగ్గించి సాగు ఖర్చులను తగ్గించుకోవచ్చని రైతులకు వివరించారు. స్థానికంగా లభించే సహజ వనరులను వినియోగించుకోవాలని సూచించారు.

జీవామృతం, బీజామృతం, వేప ఆధారిత కషాయాలు, మల్చింగ్ తదితర సహజ వ్యవసాయ పద్ధతులను అవలంబించడం ద్వారా నేల సారాన్ని పెంపొందించుకోవచ్చని అధికారులు తెలిపారు. రైతులు ప్రకృతి వ్యవసాయ పద్ధతులను పాటించి ఆరోగ్యకరమైన పంటల ఉత్పత్తికి కృషి చేయాలని సూచించారు.

ఈ కార్యక్రమంలో రైతులు, మహిళా రైతులు, కృషి సఖి ముదిరెడ్డి సందీప, చల్లాన్ నాగమ్మ, పద్మ, నాగిరెడ్డి, రవి, శ్రీనివాస్ రెడ్డి, AEO రమేష్ తదితరులు పాల్గొన్నారు.